早前我同大家報導過，騰訊旗下遊戲《荒野起源》（Light of Motiram）因為與Sony旗下《地平線》（Horizon）系列非常相似，所以被Sony於美國入稟提告。而近日有外媒就發現騰訊靜靜雞修改《荒野起源》嘅Steam頁面，大幅刪減「機械生物」與「戰鬥」等元素嘅佔比，似乎係刻意避免與《地平線》太過相似。

舊宣傳圖

新宣傳圖

外媒《The Game Post》從能夠顯示Steam頁面所有更新紀錄嘅「SteamDB」上發現，《荒野起源》嘅頁面於上週四進行咗多個改動。首先係原本嘅五張宣傳圖中有三張被替換，而新換上嘅宣傳圖就大多係陽光明媚嘅田園風光，又或者疑似進行飛行競賽嘅畫面，似乎係刻意避免「機械生物」及「戰鬥」等元素。另外原本於宣傳圖中佔重要位置嘅「疑似」女主角亦無咗影，連主宣傳圖都換成可愛嘅機械企鵝。

另外遊戲嘅文字簡介亦有更新，從之前明確提到「大型機械生物」及「開放世界」等，變成「在這片文明湮滅的荒野中，原始的文明、變換的氣候、時刻挑戰著你的生存極限，合理地利用身邊的一切來維持生存。從勉強果腹到挑戰boss，每一步都充滿危機與勇氣。克服重重困難，才能在這片荒野中立足。」

舊宣傳圖

新宣傳圖

換言之《荒野起源》嘅新介紹似乎係刻意避免展示與《地平線》最相似嘅地方，而且將遊戲由以往嘅「開放世界冒險」重新包裝成起屋、打獵、收集嘅生存遊戲。但騰訊此舉能否避開侵權指控仍係未知之數，事關最相似嘅「機械文明」元素其實仍然存在。

另一邊廂，今次騰訊仲將遊戲嘅發售日由之前嘅「稍後公佈」改成「2027年第四季」，唔知係咪代表佢哋好有信心遊戲可以推出市面？

資料來源：The Gamer Post