迪士尼高層開始意識到，Marvel同Lucasfilm（《星球大戰》、《奪寶奇兵》系列）等傳統IP已經難以吸引13至28歲嘅Z世代男性，目前正督促創意團隊開發全新原創IP，專攻呢班年輕觀眾。

據外媒《Variety》報導，雖然迪士尼在過去20年憑收購Marvel及Lucasfilm，成功令唔同年齡層嘅男性觀眾著迷，但隨住近年《星球大戰》系列電影項目停滯不前（上一部電影已經係2019年），加上超級英雄電影觀眾流失加劇。迪士尼現正向創作人員施壓，要求開發出全新原創IP，例如大型環球冒險、尋寶故事、或者適合萬聖節檔期應節片等新題材，期望重新吸納年輕男性觀眾重回戲院。

呢項重任將由迪士尼高層David Greenbaum負責，佢由2024年開始接手迪士尼真人版電影部門，此前曾係Searchlight Pictures聯合總裁，專攻文藝獨立片。與此同時，佢亦都搵咗擁有豐富商業片經驗嘅前派拉蒙高層Daria Cercek幫手，對方曾操刀過《超音鼠大電影》、《無聲絕境》、《魅笑》等系列電影。

迪士尼現時在Z世代市場票房佔率約10%，同Sony影業及派拉蒙平起平坐，比環球影業高2%，但低過華納兄弟2%。其主力觀眾係29至44歲嘅千禧世代，事關呢班人細個係睇《獅子王》、《101斑點狗》及《扮嘢小魔星/史迪仔》等經典動畫長大，如今就帶住小朋友一齊入戲院睇真人版重啟電影。順帶一提，其中真人版《史迪仔》全球票房更突破10億美元，並特別受男性歡迎，觀眾比例仲高過女性。

不過，Z世代就冇呢啲情懷，反而呢代人會為遊戲相關IP或者社交平台meme入場。例如華納嘅真人版《Minecraft》全球票房近十億美元，皆因呢款遊戲係佢哋由細玩到大，加上佢哋會喺影院拍片上TikTok，掀起病毒式傳播熱潮。而2022年在TikTok上嘅「#gentleminions」風潮亦係一個好例子，一班Z世代男性身穿西裝一齊入戲院睇環球影業嘅《迷你兵團2》，再透過社交媒體瘋傳，帶動更令更多人仿效。

「#gentleminions」風潮

迪士尼目前依然係票房之王，過去16個月內有4部電影破10億美元票房（真人版《史迪仔》、《魔海奇緣2》、《死侍與狼人》、《玩轉腦朋友2》），其他片廠無一能及，加上年尾上映嘅《阿凡達：火與燼》同《優獸大都會2》好大機會再破10億。所以，業界好震驚迪士尼竟然唔再單靠Marvel同星戰等現有IP穩袋票房，而係大膽另闢蹊徑。究竟迪士尼會點樣用新IP搶攻Z世代男性呢？大家拭目以待吧！