改編自PlayStation遊戲《The Last of Us Part II》嘅HBO真人版劇集《The Last of Us》第二季，自從在今年4月播出後，評價就一集比一集差。除咗因為劇情本身鍚死男主角Joel、加入同性戀情節惹來爭議之外，唔少觀眾亦不滿劇情改編同Bella Ramsey嘅外貌與演技，覺得佢同遊戲入面嘅Ellie相差太遠。

面對外界批評，Bella Ramsey日前喺Podcast節目《The Awardist》坦言，自己會盡量避開呢啲評論：「因為我都改變唔到啲咩，劇集已經播出咗，冇得改動。所以我覺得，睇或者理會呢啲評論真係冇咩意思。當然，每個人都有權表達自己嘅意見，但呢啲意見唔會影響劇集本身，亦唔會唔影響套戲點樣繼續拍落去。對我嚟講，呢啲係兩碼子嘅事，我唔會參與其中。」

談到即將製作嘅第三季，Bella Ramsey更毫不忌諱表示，如果Haters咁憎呢套劇，大可以唔睇：「你冇必要睇㗎。如果你真係咁憎呢套戲，原著遊戲仲喺度，你可以返去再玩一次。但如果你想睇，我希望你會鍾意。」

事實上，Bella Ramsey今年4月接受《The Hollywood Reporter》訪問時，就表明唔會容忍網上針對劇集嘅惡意批評。報導提到，第一季大獲成功後，有Fans開始不斷批評Bella Ramsey外貌與遊戲角色Ellie不符，於是佢決定喺第二季播出前幾個月，停用晒所有社交媒體帳號：「我一直知道總有一日我會停用（社交媒體），而且我一開始就唔係咁想用社交媒體。呢個決定唔係咩大事，但的確有部份原因係因為第二季即將播出。如果我避開唔上Twitter同Reddit，而我而家亦係咁做，咁一切就冇問題啦。」

至於劇集未來，目前HBO已宣布續訂《The Last of Us》第三季，但曾經擔任第一同第二季共同編導兼Naughty Dog總裁Neil Druckmann將會退出製作，而參與過部份集數嘅共同編劇Halley Gross亦唔會再參與。換言之，第三季將由Craig Mazin獨力操刀，擔任節目統籌同編劇。按照原作劇情推測，預計第三季故事會轉到Abby嘅視角展開，具體播出時間仲要等官方公布。