派拉蒙（Paramount）與微軟旗下遊戲發行商動視（Activision）正式簽署合作協議，宣布要將人氣射擊遊戲系列《Call Of Duty》推上大銀幕！不過，暫時未知會係改編《現代戰爭（Modern Warfare）》或《黑色行動（Black Ops）》等子系列，定還是創作全新故事及角色。

根據新聞稿，派拉蒙將負責開發、製作及發行一部以《Call of Duty》為主題嘅真人電影。電影會保留系列標誌性嘅緊張刺激動作場面及扣人心弦故事，同時將呢個流行咗20多年、全球銷量超過5億套嘅遊戲IP推廣到全新觀眾群。並承諾電影會忠於原作遊戲嘅豐富劇情及獨特風格，確保無論係老Fans定新觀眾，都能夠感受到真實又震撼嘅電影體驗。

對此，派拉蒙主席兼行政總裁David Ellison興奮表示：「作為一個《Call of Duty》死忠，今次合作簡直係夢想成真！由最初嘅盟軍戰役到《Modern Warfare》同《Black Ops》，我喺呢個系列花上無數小時。能得到動視及全球玩家信任，將呢個精彩嘅故事宇宙搬上大銀幕，真係一份重大嘅榮譽同責任。我哋會用製作《Top Gun: Maverick》嘅嚴謹態度同追求卓越嘅精神，去製作呢部電影，確保能夠達到Fans同系列嘅超高標準。我哋嘅目標好清晰：締造一場能令老Fans熱血沸騰，又能吸引新一代觀眾嘅電影體驗！」

雖然過去唔少遊戲改編影視作品都慘不忍睹，但近年荷里活似乎終於搵到成功嘅秘訣，例如《真人快打》、《超級瑪利歐兄弟大電影》、《異塵餘生》、《最後生還者》（第一季）、《MINECRAFT：我的世界大電影》等等都有唔錯嘅成績。而派拉蒙之前亦成功憑《超音鼠》改編電影大收旺場，希望今次《Call of Duty》真人版電影都能改得精彩，唔會淪為「慘遭真人化」啦！