2016年嘅《Deadpool》之所以能夠製作並上映，好大程度在於2012年拍攝、由Ryan Reynolds主演嘅試片片段於2014年突然流出網上，而且深受影迷喜愛。不過咁多年黎，一直都無人知道究竟係邊個流出片段——直到近日，Ryan Reynolds終於承認自己係「幕後黑手」。

其實過去就已經有唔少人估計《Deadpool》嘅試片係由導演Tim Miller或者主角Ryan Reynolds刻意流出，目的就係挑「民意」逼使20th Century Fox為電影開綠燈，不過有關人士過去從未承認，Ryan Reynolds仲多次話自己仲搵緊個幕後黑手。直到Ryan Reynolds日前出席加拿大多倫多電影節，再次被問到當年流出事宜時，就終於承認：「係嘅，我係出咗少少貓嘅，但我覺得我係為咗啲大家都會感興趣嘅嘢而做。而且我好感激自己嗰陣有跟隨本能行事，好感激自己喺嗰一刻做咗錯事。」

至於流出原因，其實亦同大家估嘅差唔多：「喺流出幾年前我就已經拍好段試片…條片就係一個個案研究，話畀大家知套戲應該可以點拍，但係當時片方就完全唔想搞呢壇嘢。然後有條茂利將條片放咗上網，我對鏡刷牙時望住呢條茂利心諗，大佬你搞咩呀，犯法㗎！但最終網絡上嘅反應逼使片方話『我哋會拍呢套戲』，24小時之內佢哋就開綠燈。」

資料來源：Entertainment Weekly