由堀越耕平創作嘅人氣漫畫《我的英雄學院》，自2022年宣布要翻拍真人版電影後，最近終於有新消息！

據外媒《THR》報導，由Netflix與傳奇影業聯手製作嘅《我的英雄學院》真人版電影，將由日本導演佐藤信介執導兼監製。佐藤信介曾經執導過《GANTZ殺戮都市》真人版以及Netflix熱門劇集《今際之國的有栖》，喺改編漫畫同動作場面方面有豐富經驗。而劇本就由曾參與《Wonder Woman（神奇女俠）》同《Argylle（特工亞皆老）》嘅編劇Jason Fuchs負責。

《我的英雄學院》故事講述地球有80%人口都具有某種歸類為「個性」嘅超能力，有人用「個性」做壞事，成為兇惡嘅反派；亦有人利用「個性」守護正義，成為受人敬仰嘅職業英雄。而主角綠谷出久就係一位天生冇「個性」嘅少年，卻自細憧憬成為一名英雄，即使困難重重亦朝著夢想進發。