由日本漫畫家鈴木祐斗創作嘅搞笑人氣漫畫《SAKAMOTO DAYS 坂本日常》，繼今年初推出電視動畫大受歡迎後，如今更宣布要開拍真人版電影！唔知目黑蓮會點樣演繹「發福版」嘅男主角呢？

今次真人版電影將由曾操刀《銀魂》真人版電影、《勇者義彥》系列嘅日本鬼才導演福田雄一執導兼編劇，而日本男團Snow Man成員目黑蓮，將會一人同時飾演「瘦版」及「發福版」男主角坂本太郎。據報導指，目黑蓮為咗完美呈現140公斤胖老爹形象，每次拍攝都要花上4小時化妝。

《SAKAMOTO DAYS 坂本日常》講述主角坂本太郎，曾經係一位令人聞風色變、備受同行敬仰嘅超強殺手，但同一位便利店女店員墮入愛河後選擇金盤洗手，辭去殺手工作。然後結婚、生兒育女、仲發福變成一個普通肥佬爸爸。然而，某日舊拍檔突然搵上門，並透露殺手界有人重金懸賞佢嘅人頭，平靜生活從此一去不返，為咗保護家人，坂本只好重操舊業抵抗各個勢力來襲。