由James Cameron執導嘅《Avatar: Fire and Ash》（以下簡稱《Avatar 3》）將於12月19日上映，亦標誌住原訂有5集嘅整個電影系列正式進入中段。不過James Cameron近日接受訪問時，就提到《Avatar 3》嘅票房將會決定未來兩集嘅命運，假如票房唔夠好的話就無得再拍落去，而佢就會改為寫本書出黎為系列收尾。

James Cameron近日登上Podcast節目《The Town with Matthew Belloni》，並提到佢對《Avatar 3》嘅票房感到緊張。佢指出，雖然佢認為《Avatar 3》嘅質素無下跌，但觀眾仍然可能會受「續集病」（sequelitis，即觀眾覺得電影續集越黎越唔好睇嘅現象）影響，令入場意欲減少；而串流平台嘅競爭以及疫情之後大家少咗入場睇戲，亦令整體入場人數只餘2019年嘅75%左右。換言之《Avatar 3》嘅票房亦可能因而受限。

James Cameron之所以咁緊張《Avatar 3》票房，唔止係因為在乎幾多錢入到自己袋，更重要嘅係《Avatar 3》嘅成績將會影響原定於2029及31年上映嘅《Avatar 4》及《5》命運。佢於節目中表示：「我哋用咗一舊好__大嘅錢去拍《Avatar 3》，所以票房要有兩舊好__大嘅錢先有賺。我好有信心佢會賺錢，問題係賺得夠唔夠多去證明應該再拍落去？」

另一方面，James Cameron亦表示自己做好哂心理準備離開《Avatar》計劃。「我拍《Avatar》拍咗廿年——如果由1995年我開始寫故事起計就三十年。如果真係要咁樣完的話，咪完囉。」至於《Avatar 3》為續集留嘅故事線，佢就表示會寫本書為其收尾。

同時佢亦強調「絕對唔會」將《Avatar》系列畀其他人接手：「我有選擇權，我可以揀自己參與幾多，我可以只做監製。但我唔認為會有另一部我無緊密參與嘅《Avatar》電影出現。呢個係講緊接管我嘅人生，亦係我嘅界線所在。」

資料來源：IGN