近年西方社會興起一股「限制成人內容」嘅風潮，而其中一個方法，就係透過Visa、Mastercard等信用卡公司向成人內容販售方施壓，以封鎖交易為要脅要求佢哋下架「敏感」內容。例如以販售H Game而聞名嘅網站DLSite去年就曾經係受害者之一。不過DLSite母公司viviON近日就同日本JCB合作推出官方信用卡「V Card」，其中一個賣點就係「可以於集團旗下所有網站順利交易」，可以話係「紳士專用」啦。

圖片：ITMedia

「V Card」為viviON與JCB合作推出嘅虛擬信用卡，申請無需入會費或年費，但要擁有實體卡的話就要畀多3000 Yen。每次購買可以有1%積分回贈，而於明年1月26日至7月31日期間，於viviON集團旗下網站嘅消費更有4%回贈。

至於回贈啲分可以點樣用，就視乎你揀邊款卡。「V Card」有分紫紅色嘅「Club viviON」，以及藍色、以集團旗下Vtuber組合「あおぎり高校」為主題嘅「Club あおぎり高校」兩款，前者儲嘅分可以用於DLSite等集團網站上當折扣使用，而後者儲嘅分就可以用於「あおぎり高校」專屬網站之上。

對於不在日本嘅各位紳士黎講，重點其實唔係申唔申請到呢張「V Card」，而係成人內容平台點樣應付信用卡公司嘅制裁。去年4月時，DLSite網站一度不能使用Visa或Mastercard嘅信用卡完成交易，僅餘JCB發行嘅信用卡可以，令紳士們買到心頭好嘅難度大增。到今年年初時Visa及Mastercard雖然回歸，但網站上大量特定標籤嘅遊戲（如「酪梨」，請向諧音方向思考）就被隱藏，外界相信係兩大信用卡公司向DLSite施壓後嘅結果。

「V Card」雖然仍係JCB發行、雖然外國人仍然不能申請、雖然DLSite近年以加入大量其他支付方法，但今次出官方信用卡，仍然意味住DLSite嘗試爭取更大嘅主導權，稍為擺脫信用卡公司嘅限制。

資料來源：ITMedia