雖然《The Last of Us（最後生還者）》節目統籌Craig Mazin曾表示原作劇情太豐富，起碼要拍到第四季先講得完。但唔知係咪因為第二季收視同評價未如理想，搞到官方似乎想盡快斬纜。最近HBO總裁Casey Bloys接受訪問時就暗示，第三季隨時會係大結局。

Casey Bloys日前接受外媒《Deadline》專訪，大談HBO多部人氣作品未來動向。當被單刀直入問到《The Last of Us》第三季係咪大結局時，佢直接表示：「目前睇落似係咁（It certainly seems that way）。」但隨後「戴頭盔」補充多句：「不過講到呢啲決定，我哋都係交返畀節目統籌話事，不如你問返佢哋。」呢番說話一出，不禁令外界猜測HBO係咪見勢色唔對，寧願將原本打算攤長拍嘅劇情，濃縮喺第三季一次過搞掂算數。

其實空穴來風未必無因，劇集原創者之一嘅Neil Druckmann早前已經宣布退出劇集製作，專心返Naughty Dog開發新Game；加上第二季評價兩極、收視率「高開低走」，種種跡象都令人覺得個系列隨時會喺第三季草草收場。

第三季預計會聚焦Abby嘅故事線

《The Last of Us》第三季目前預計會喺2027年正式播出。如果真係如Casey Bloys所講係最後一季，意味著製作組可能要將原本預算兩季嘅內容，「硬塞」入一季裡面，劇情大刪減恐怕無可避免。唔知大家又寧願《The Last of Us》喺第三季完咗佢就算，定係想佢長氣啲拍多季，還原返遊戲所有細節？