經過一輪激烈競標後，著名獨立製片公司A24正式奪得《德州電鋸殺人狂》影視改編權，並隨即宣布開發全新電影同劇集，由荷里活當紅男星Glen Powell坐鎮監製，話題恐怖片《Strange Darling》導演J.T. Mollner操刀。

據外媒《THR》報導，A24首階段會優先開發劇集版，並由《Strange Darling》導演J.T. Mollner擔任導演，而本身喺德州出生長大嘅Glen Powell，就會透過自己嘅製作公司Barnstorm Productions參與項目。佢透過聲明分享感受：「《德州電鋸殺人狂》係我最愛嘅電影之一，亦係我老家德州嘅影壇傳奇。我好榮幸能同Barnstorm合作，為呢部經典之作同IP開啟新篇章。」雖然唔少影迷更想Glen Powell親自落場，被Leatherface追殺（或者反殺），但據目前消息，佢只係擔任執行監製（Executive Producer），暫時未有計劃參與演出。不過世事無絕對，既然係自己監製，話唔定會客串返個「路人甲」俾電鋸鋸下？

而J.T. Mollner亦透過聲明表示：「我曾公開講過，我冇興趣重拍一啲已經係完美嘅電影，而 1974年原版《德州電鋸殺人狂》就係完美嘅。」所以今次劇集唔會係單純翻拍，而係利用長篇劇集嘅空間，深入探索Leatherface嘅恐怖世界同人物背景。

除咗劇集版，A24亦同步開發緊一部全新電影。不過要留意嘅係，J.T. Mollner只會專注製作劇集，電影版將由另一班人馬負責，目前仍處於早期開發階段，尚未公布導演及編劇人選。今次整個重啟計劃（電影加劇集）嘅監製陣容相當鼎盛，除咗Glen Powell之外，仲有《It》《Barbarian》監製Roy Lee、以及1974年原版電影共同編劇Kim Henkel，相信質素點都有保證。

《德州電鋸殺人狂2022》

《德州電鋸殺人狂》自1974年原版電影上映後，該系列先後推出過8部續集、前傳同重拍版，最新一部係Netflix 2022年推出嘅《德州電鋸殺人狂2022》，但評價相當麻麻。唔知有A24嘅獨特風格加持下，呢個早已被翻拍到「爛爛地」嘅經典IP，可唔可以重返神枱呢？