雖然Tom Hardy主演嘅《Venom（毒魔）》真人版三部曲已經正式完結，但官方並無打算就此放棄呢個人氣IP。最近有消息指，Sony Pictures Animation正為呢位人氣反英雄籌備全新動畫版電影，帶領共生體強勢踩入動畫世界。

據外媒《THR》報導，Sony已邀請到《Final Destination: Bloodlines（死神來了：血脈）》導演檔Zach Lipovsky同Adam B. Stein聯手操刀，而在真人版飾演Eddie Brock/Venom嘅Tom Hardy，今次亦會以監製身份繼續參與其中，不過暫時未知佢會唔會親自幫手配埋音。據悉片商已經開設咗專屬編劇室開始度橋，但尚未確定編劇人選。

其實Sony今次轉陣拍動畫，可能會係一個明智嘅決定。事關真人版《Venom》系列雖然喺全球累積咗超過18億美元嘅驚人票房（不過評價兩極），但特效同動作場面往往受制於現實框架。相反，如果改用動畫形式呈現製作團隊將會有更大自由度，去還原出共生體嗰種瘋狂變形、視覺張力爆燈嘅原著漫畫效果，話唔定能夠好似《Spider-Verse（蜘蛛俠：跳入蜘蛛宇宙）》系列咁大獲成功。不過荷里活動畫製作需時，加上目前項目仍處於「十畫都未有一撇」嘅初期開發階段，況且大家都要等返好幾年先有得睇。