除咗近期推出嘅原創動畫《狸想奇兵（Hoppers）》大收旺場，Pixar正積極開發多部經典IP續集電影！當中包括大家嘅童年回憶《怪獸公司（Monsters, Inc.）》第三集，而《超人特工隊3（Incredibles 3）》及《玩轉極樂園2（Coco 2）》亦預計會未來幾年陸續登場。

據《The Wall Street Journal》最新專訪透露，Pixar目前正大力推動多部人氣作品續作。早前已於D23博覽會公布、由《元素大都會》導演Peter Sohn執導嘅《超人特工隊3》預計會喺2028年上映；而催淚神作《玩轉極樂園》續作則預計在2029年登場。

不過最令Fans驚喜嘅，就係Pixar正開發《怪獸公司》第三部電影！呢個系列自2001年首集上映後深受全球觀眾歡迎，其後於2013年推出前傳《怪獸大學（Monsters University）》，再喺2021年推出Disney+劇集《怪獸開工（Monsters at Work）》。雖然目前尚未公布第三集會由邊位導演操刀、劇情時間線點樣設定，以及毛毛同大眼仔會有咩新發展，但消息一出已經足夠令一眾Fans熱血沸騰。

除咗大推續集穩陣吸金，Pixar亦會繼續開發原創故事。包括將於下年推出、講述威尼斯貓貓怪盜冒險故事嘅《Gatto》，以及一部以亞洲神話為靈感、描寫生者與亡者可以交流嘅神秘市集故事《Ono Ghost Market》。據悉《Ono Ghost Market》原本計劃製作成Disney+劇集，但後來被「升格」為院線電影。此外，Pixar仲籌備緊工作室首部音樂劇電影，將由《熊抱青春記（Turning Red）》導演Domee Shi親自操刀。