圖片：MANUTD

「If you can’t beat them, join them.」呢句世界級soundbite相信大家都知出自曼聯名宿奧雲把口，出身自利物浦嘅佢當年免費加盟曼聯激嬲全世界利迷，不過利物浦星期四竟然就委任奧雲成為利物浦第一位國際親善大使，令全球利迷都嘩然。

圖片：Independent.co.uk

奧雲自己就話 :「身為利物浦球迷可以為球會擔任呢個國際性嘅位置真係感到非常高興同榮幸。」如果奧雲話自己從來係利物浦球迷就未免太無說服力，當年奧雲傷患連連，利物浦對佢都係不離不棄，但佢一傷好好快就為歐聯冠軍轉投皇馬，經歷過紐卡素嘅霉運再轉投曼聯就令所有利迷視佢為叛徒。

圖片：Livepoolfc

識睇一定睇留言，利迷又點睇呢單嘢？有啲就話「搵條蛇做親善大使？唔x係呀嘛？」；有啲又話唔爭在搵埋史達寧啦；有人又建議其他人選，話如果奧雲都做到，不如搵迪奧夫仲好啦。話晒第一個利物浦嘅國際親善大使，人選就算唔係球會傳奇，都唔係搵個打過死敵架嘛？早前嚟咗香港利物浦足球學校活動嘅班尼斯都係唔錯嘅人選啦，到底要無腦成點先可以搵奧雲做親善大使？

圖片：dailymail.co.uk

利物浦嘅公關出事都唔係第一次，2013年利物浦對曼聯比賽前就喺twitter 出post叫球迷提供三首歌俾佢哋喺更衣室度播，有啲唔生性嘅球迷就俾咗三首嘲笑慕尼黑空難嘅歌利物浦，紅軍twitter無叫呢位球迷尊重其他球會不特止，仲好風趣咁反問球迷：「你係咪偷睇過我哋部ipod架?」(Have you been sneaking a look at the dressing room iPod?) 事後利物浦好快就刪post兼道歉。利物浦要再發展都一定要面向國際，除咗吸引更多球星同爭取好成績去取得海外球迷歡心之外，良好公關技巧都係重要嘅，紅軍想復興，marketing同PR都要好好增兵先得。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/