雖然執筆時仲未宣佈摩連奴正式接手教曼聯，不過睇嚟只係差個官方聲明咁啫。曼聯尋晚香港時間凌晨左右就宣佈雲高爾正式離隊，人都走咗，再剷佢都無意思。唔少曼迷睇方丈執教嘅曼聯都嘔幾兩血，不過，佢執教嘅呢段時間都留咗唔少嘢俾曼聯，幫後費格遜時嘅曼聯復興奠下基礎。

圖片：dailymail.co.uk

伸記唔記得雲高爾一嚟到曼聯就要求改進卡靈頓訓練基地嘅設施，例如加裝高清攝錄機了解球員訓練時嘅細節；加強球場嘅照明系統令球員冬天都可以練習；最重要係重舖練習基地草皮，令練習場地質同奧脫福一樣。今季曼聯主場成績靠得住實係有原因架。

圖片：uk.sports.yahoo.com

曾經教過巴塞隆那同拜仁慕尼黑，即使兩間球會球迷一講雲高爾都會咬牙切齒，但你又不得不承認，沙維、佩奧爾、恩尼斯達、拿姆、湯馬士梅拿、舒韋恩史迪加都係雲高爾由青年軍帶到上一隊，再變成世界級球星。至於曼聯，佢執教期間就有14位青年軍球員被佢帶過上一隊上陣，雖然佢只係因為今季傷兵問題嚴重先用青年軍，但佢揀得上一隊嘅表現都有咁上下，特別係拉舒福等同科素文沙兩位。

圖片：Rueters

以前莫耶斯CV唔靚只靠費sir光環好難買到好球員，係佢曼聯生涯失敗原因之一。雲高爾嚟曼聯前己經喺荷蘭、西班牙同德國都驘過冠軍。就算方丈份人唔夠政通人和，都有好多球星爭住想同佢合作。好似小豬、迪馬利亞、法卡奧、白蘭特等等，當然有啲嚟一季就走，你明點解嘅。

圖片：manutd.com

圖片：eurosport.com

當然，無人會忘記雲高爾前幾日為曼聯驘到足總盃啦，好多人話足總盃係「飛機盃」，不過足總盃對曼聯係非常有意義。除咗佢係後費格遜時代第一個冠軍之外，曼聯喺2014年之後都未驘過足總盃，而且英格蘭足總盃本身係一個歷史悠久嘅錦標，所以足總盃對曼聯仲係好有意義。

圖片：dailymail.co.uk

下季好大機會都係摩連奴教曼聯，我心情都幾十五十六，事關老豆頭兩季表現真係有保證，呢兩三年曼聯咁頹邊個唔想威威先。但同時又好擔心一手由雲高爾發掘嘅明日之星會點，捧得曼聯都唔想兩三年換次領隊，如果摩連奴都想長教，都需要用同以前教其他球會唔同嘅心態去看待呢班小紅魔。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。