圖片:mirror

完咗歐洲國家盃，球迷嘅目光又返翻去球會嗰度，身為獌狗嘅我梗係關心返曼聯啦。上星期六曼聯就同英冠升班馬韋根打咗場友賽，呢場友賽意義重大，一來係摩連奴第一場帶曼聯嘅比賽，二來係上季歐聯斷腳重傷嘅左閘梳爾終於復出。季前友賽嘅意義，都係睇下現人腳邊個仲可以留低，球隊狀態去到邊咁。而喺車路士時已經同摩連奴不咬弦嘅馬達就係今季離打隊嘅大熱，而家仲傳緊愛華頓同某啲西甲球會想搵佢加盟，不過睇完呢場比賽，過咗九月，馬達好大機會仲喺曼聯球員。

圖片:mirror

曼聯最後以2-0贏韋根，兩個入球都係下半場發生，摩佬喺下半場換咗七位球員，馬達就係其中一位下半場出場嘅球員，可能因為無入選西班牙歐洲國家盃陣容啦，馬達感覺上都幾餓波，即使喺前場做緊迫工作都好落力。最後馬達努力得到回報，把握到韋根門將積斯基拿倫開龍門球一次失誤偷到波，將交俾韋爾堅尼幫曼聯開齋，而馬達整場比賽表現都好生猛，同上季完全唔同！

圖片:mirror

今場摩連奴將馬達擺返去熟悉嘅10號位，並且俾返足夠嘅自由度馬達去走位同隊友配合創造出唔少機會，比起上季打翼右經常不自覺走返入中間導致中路塞車更有效率，上季馬達長期打唔擅長嘅右翼都入到10球波，如果摩佬今季留佢打返攻擊中場，相信都有唔少貢獻，加埋新加盟嘅米希達恩，要搵邊個打呢個正選位都有排頭痕，而馬達賽後同摩佬都有幾句，關係睇嚟唔錯，應該無咁易被賣掛？

圖片:squawka

馬達就打得精神爽利，但另一位邊緣人迪比就依舊唔長進，除咗上半場接應米希達恩嘅致命斜線射出界外，啲傳球都係傳到出晒界，雖然迪比休季期間都有加操，不過意識同上季都係咁上下，想留低嘅話真係祝佢好運。

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。