上星期皇馬正式同C朗拿度續約，C朗將會留隊到2021年，不過今次續約比起上次就少咗好多外間關注。上次續約前大家就關注C朗會唔會重投曼聯，今次坊間就關心佢個四眼簽約look多過份約內容係乜。其實去到2021年C朗已經36歲，以翼鋒嚟講絕對係強弩之末，不過C朗就好自信認為自己到時仍然可以得到皇馬續約踢到40歲。老老實實，以C朗質素要好似傑斯同托迪打到40歲仲有貨交真係唔難，不過係唔係仲留到喺皇馬就另一回事啦。

大家而家見到C朗一身肌肉，可能都唔記得佢出道時嘅時候係一名排骨仔。後來C朗為咗應付體能需求極大嘅英超就努力健身，喺曼聯時為咗爭取時間鍛鍊仲多次喺卡寧頓訓練基地關閉時偷入健身室做gym，所以C朗而家一身肌肉就係佢力爭上遊嘅最好證明。其他例如控制飲食呢啲就唔使多講，最癲係C朗每日都會好堅持做3000下sit up，所以你甚少聽到C朗有腰傷問題。雖然有講法話C朗太大隻對佢技術反而有不良影響，但係一副免於傷患嘅身體，真係可以令C朗長踢長有。

傑斯全盛時期雖然靠速度搵食，後來因為年紀增長呢種優勢慢慢消失，就開始轉打中場中，利用經驗同足球智慧轉型延續佢嘅球員生命。事實上C朗打法都有隨住佢年紀增長而微調，雖然佢主力位置仍然係翼鋒，不過佢已經少咗用速度同技術喺邊線突破，反而更多時間係自己搵有利位置入波。而家嘅C朗打法無咁細膩，不過就用返多啲身體對抗作為主要殺著。只係過幾年C朗身體機能無咁好時就要再轉型，但以C朗嘅上進心，呢個唔難做到。

既然C朗身心都咁完美，踢到40歲有幾難呢？真係唔難，不過喺皇馬終結職業生涯難咋嘛。講人情味講團隊精神，巴塞真係贏皇馬9條街。希亞路、魯爾、古迪、卡斯拿斯幾個親生仔除咗無得喺皇馬掛靴之餘連紀念賽都唔係個個有，畢竟喺主席珮雷斯眼中球員都只係工具。不過，C朗雖然唔係親生仔，不過講吸金能力佢就贏晒呢班名宿。Nike近日同C朗簽咗終身贊助合約，聽聞付出嘅努力好比80年代簽米高佐敦一樣，不過而家皇馬嘅球衣贊助仲係adidas，如果嚟緊Nike真係爭到皇馬贊助，珮生會唔會網開一面呢？

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青