男人去的聖誕裝飾東港城X變形金剛基地保衛戰

文：MenClub 魏文青　　
POSTED ON 19 Nov 2016

每逢聖誕，各大商場都會推出不同主題裝飾，而你好有可能都會去過哂——唔係因為你想去，係因為你條女想去！而就算去到其實你都係冇份睇，因為你嘅身份其實係「隨行攝影師兼拎袋助手暨自拍比例尺」，主要工作係揸機、拎袋、大叫「好靚呀」、同自拍嘅時候襯托佢塊面有幾咁細。係咪諗起都覺得攰呢？好在今個聖誕東港城就搞咗個啱男人去嘅《東港城x變形金剛-基地保衛戰》，終於到你條女做你嘅攝影師啦——如果你夠膽提出嘅話。

東港城由11月19日開始就會舉行《東港城x變形金剛-基地保衛戰》活動，於一樓展覽場展出以《變形金剛G1》為主題嘅場景擺設，當中最搶眼嘅就兩個三米高嘅柯柏文、麥加登雕像！隔離仲有貨車形態嘅柯柏文添！絕對係必影位黎！

另外就有兩大互動遊戲，只要企喺螢光幕前就可以化身成變形金剛，再用QR Code下載張相，就可以瘋狂轟炸你啲陪緊女友嘅男仔朋友。另外仲可以免費試玩PS4嘅《Transformer Devastation》，不過以過往經驗黎講，呢個位會比一大班小朋友佔領咗。大人大者我建議你買返屋企玩算啦！

如果你自己都已經有小朋友，咁以下呢兩個展區就啱哂你。逢星期五六日及公眾假期，經典玩具試玩區都會擺出多款八十年代嘅經典變形金剛G1玩具，而且真係可以拎上手玩。你就可以同小朋友一邊玩，一邊分享你當年睇卡通、玩玩具嘅經驗，親子關係咪就係咁建立架囉！

另外就係另一邊嘅粉絲珍藏展，會展出收藏家Gary Charm珍藏嘅幾十隻變形金剛G1模型。其中就有孩子寶出嘅第一隻柯柏文。想當年孩子寶為咗宣傳玩具而拍咗三集短篇，點知動畫反應極好，好多小朋友要求電視台繼續播，結果造就接下年幾十年嘅熱潮。
另一隻Gary特別介紹嘅係呢隻狂派恐龍基地。特別之處係佢無意中喺一間舊文具店發現，見標價只係二百零蚊，二話不說就買咗返屋企，上網check 下先知原來值四千幾銀。Gary 話好多舊文具店都當年都有入落啲變形金剛玩具，但因為各種原因就留咗喺到，到依家拎返出黎就當清貨咁賣，所以有時都會執到寶。
最後就係Pop-up Store，除咗模型之外都有唔少周邊商品，例如G1系列，對眼識發光嘅6吋柯柏文($750) , 麥加登、天鷗同雷公(各$800) 。鍾意電影版嘅你都可以揀尺幾長嘅鋼鎖(送迷你柯柏文，$980) 或者《變形金剛4》版本嘅柯柏文($750) 。

呢個《東港城x變形金剛-基地保衛戰》會由11月19日一路「堅持」到12月27日，好有可能係今個聖誕少數你真係想去嘅商場裝飾，所以記住把握機會同女朋友提出啦！祝你好運啦！《東港城x變形金剛-基地保衛戰》日期：11月19日~12月27日時間：10am~10pm 地點：東港城一樓展覽場。注：「經典玩具試玩區」逢星期五六日及公眾假期，1pm~6pm開放，每15分鐘一節。