今年金球獎《法國足球》雜誌同FIFA嘅世界足球先生又分家，所以今年我哋比以往更早知道邊個得到金球獎，而今年得主就係C朗拿度。今屆金球獎靜得非常緊要，好似大家都覺得C朗得獎係意料中事一樣——咁又難怪嘅，C朗同美斯兩位球會成績一樣輝煌，而國家隊方面就兩位嘅個人表現都麻麻地，不過今年C朗幫助葡萄牙贏到歐洲國家盃，確實幫佢拎到唔少本錢鍊贏美斯嘅。

雖然葡萄牙今屆成功贏到歐洲國家盃係受惠於改制，不過呢個始終係葡萄牙首個歐洲國家盃，意義非常重要；另一邊廂美斯連續三年國際盃賽都殺入決賽，但都未出能捧盃，更一度心灰意冷退出國家隊。雖然最後經過好多人努力之下收回成命，但成件事都令美斯相當狼狽。而球會方面C朗今季所有賽事入咗51球，比美斯多10球。雖然巴塞隆那今季贏咗西甲冠軍，但皇馬三年內兩奪歐聯，令C朗喺今年金球獎競爭力提升唔少。

至於金球獎第三名就有啲驚喜，得主就係馬體會射手基沙文。呢位法國前鋒近年都係轉會市場新貴，有唔少英超球會同歐洲班霸都同佢拉上關係。上個月佢就話自己雖然以金球獎為目標，不過有C朗同美斯喺度就好難爭咁話。馬體會近年飲恨歐聯，當然唔會咁易放走呢位皇牌射手，今年夏天就成功續約，違約金仲高達8000萬鎊。今次金球獎成功超越尼馬、蘇亞雷斯同湯馬士梅拿等巨星殺入三甲，睇怕佢身價又要翻一翻。

公佈金球獎得主同一日亦都係歐聯十六強抽簽，其中最矚目就係阿仙奴今季難得小組首名出線，以為十六強可以抽支好簽順順利利入八強，點知遇著拜仁慕尼黑，睇怕阿仙奴球迷都好難笑得出。不過我又覺得一日未踢，一日都唔使打定輸數住嘅，而且拜仁中前場仍然好依賴列貝利、洛賓同利雲度夫斯基組成嘅進攻三角，不過佢哋年紀都開始大，上季加盟嘅杜格拉斯哥斯達同維達爾表現又唔穩定，雖然而家拜仁喺德甲都係榜首，不過都被RB萊比錫追得好緊，而阿仙奴嘅人腳強得嚟又有默契，鬥起上嚟都唔係完全無得打嘅。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青