利物浦嘅官方頻道「LFCTV」除咗有球隊比賽精華同球員訪問之外，仲有唔少關於紅軍名宿同傳統嘅紀錄片。而佢哋上星期三就有一條名為《Lovren: My Life as Refugee》嘅紀錄片，就連作為曼聯球迷嘅我都睇得津津有味。顧名思義，呢條22分鐘嘅紀錄片係由隊中克羅地亞藉中堅洛夫雲為主角，講述自己喺波斯尼亞小村莊出世，因為內戰避走德國，最後喺克羅地亞克服由被歧視，到安定落嚟成為職業球員嘅過去，以過來人身份呼籲各位俾個機會難民。

洛夫雲係喺波斯尼亞出世，同父母就生活喺一條小村莊，生活好簡單平凡，不過就充滿愛同幸福。直到波斯尼亞內戰爆發，唔少波斯尼亞人流離失所，洛夫雲當然亦唔例外，其中一個叔叔被士兵脅持，更大庭廣眾之下用刀殺死，自此佢就好少提起呢位親人，因為對佢黎講打擊實在太大。結果洛夫雲就同屋企人喺1992年時移居德國逃避戰亂。

之所以會走去德國，係洛夫雲嘅公公係喺慕尼黑工作。留居慕尼黑令洛夫雲開始鍾意拜仁慕尼黑同接觸同足球，仲同過艾爾巴、巴士拿、利沙拉素等球員合照合照。不過父母要為口奔馳，早出晚歸，生活其實非常艱苦，而且一直未能成功申請德國居留權，所以每六個月收拾一次行李以防被政府迫遷。直到1999年，舉家終於要離開德國，再一次移居去到克羅地亞。喺克羅地亞時，父母曾經將洛夫雲心愛嘅溜冰鞋賣走以換黎一星期嘅使費，而洛夫雲就因為口音問題俾同學歧視，經常同同學打交，到洛夫雲用咗兩年時間學識克羅地亞語之後情況先有改變，後來更加入地區球會NK Karlovac開始職業球員生涯。

短短一篇文好難講晒成條片，不過洛夫雲幫利物浦拍呢條紀錄片，某程度上係回應美國總統特朗普近日簽署行政命令阻止伊斯蘭移民及難民入境。洛夫雲經歷嘅事，肯定比佢喺片中講嘅更多，希望各位睇完次後，唔好覺得每一位難民離鄉別井都係為攞著數。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。