上星期英格蘭聯賽盃決賽，修咸頓雖然表現唔錯，甚至有人話仲好過曼聯，不過最後都以2-3輸波未能捧盃。與其話佢哋輸畀曼聯，不如話曼聯靠伊巴謙莫域一個救全家。唔覺唔覺，伊巴已經喺各項比賽為曼聯入咗26球，雖然同上季喺PSG入成50球仲有距離，但一個35歲前鋒可以喺英超保持咁嘅水準都算係相當巴閉。伊巴加盟時其實只係簽咗一年約，所以曼聯而家都開始同「呂布」傾續約，而呢位瑞典前鋒對續約表示歡迎，不過就希望簽兩年長約。我就認為紅魔唔使考慮太多，始終伊巴喺曼聯嘅作用，唔止入波咁簡單。

依家呢隊曼聯同前兩任領隊在位最唔同嘅係夠晒年青同活力，不過有陣時又嫌佢哋太年青，無邊位可以做到必然正選，同時又有經驗地位帶嚟凝聚力。長遠嚟講曼聯絕對需要一個咁嘅領袖人物。而呢個人未出現之前，伊巴就係最佳「替工」。拉舒福特同馬迪爾都對呢位瑞典老將讚不絕口，而同佢最夾當然係一樣係今季加盟嘅普巴啦。上次聯賽盃賽後訪問，伊巴就笑罵普巴記錯佢係收購返嚟，可以見到佢雖然有一定地位，但又唔會好似堅尼咁霸氣外露，曼聯一眾小將要向佢請教都唔係難事。

如果話前兩季曼聯係靠晒迪基亞，咁今季就一定係靠伊巴。今季曼聯防守算係唔錯，不過進攻方面，一係就組織唔到攻勢，一係就成日中柱中楣。曼聯至今喺英超有38個入球，當中有15個係呂布貢獻，所以你話係唔係「要不是呂布」喇。再講，雖然拉舒福特打前鋒相當有天份，不過始終仲係太幼嫩難以擔大旗。呢幾年俾伊巴以老帶新慢慢接班先係最理想。

又順便講下，由上年年底一直有傳曼聯會羅致馬體會法國前鋒基沙文，而基沙文又周不時對有關轉會消息講幾句，搞到一眾曼迷心癢難耐。呢位法國國腳一來本身就係曼聯兼碧咸fans，同普巴又份屬老友，加盟要考慮嘅就只有戰術角色同轉會費。當然大家比較擔心係而家主打4-2-3-1嘅曼聯，喺戰術上能否容納到基沙文。另外又有消息話如果買唔到基沙文，哈利簡尼就會成為曼聯另一目標，仲願意為佢出8000萬鎊。不過要簽哈利簡尼難度應該就高好多，首先呢位英格蘭國腳今季先同熱刺續約，而且熱刺依家排名仲高過曼聯，曼聯對佢嚟講唔算太有吸引力。

李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。