夏天除咗熱之外，最麻煩就多蚊蟲，而蚊蟲之中最恐怖嘅又要數曱甴——因為就算你本人唔驚，你都會比隔離條友嘅恐怖尖叫嚇親，所以如何消滅曱甴就成為大家夏天必定研究嘅課題。你以為唔使用劍用黑X風就得？日本網民近來就熱烈討論緊一隻殺蟲劑，話佢非常好用，但同時非常恐怖！

圖片：フマキラー ゴキブリ 駆除 殺虫剤 スプレー ワンプッシュ プロプラス on Amazon

呢隻「ゴキブリワンプッシュプロプラス (意譯：曱甴一下清Pro Plus)」近日成為日本Amazon上殺蟲劑類別嘅銷售第一，再睇睇下面嘅用家評測，就發現佢嘅殺蟲威力深受用家認可，但同時佢哋亦提醒有意試用嘅人要小心，事關「曱甴一下清Pro Plus」嘅原理，係噴喺曱甴出沒嘅地方(例如廚房)，殺蟲劑會滲入各個黑暗罅隙令曱甴中毒，但同時亦會留返些少時間等佢走出有光嘅地方，方便大家執屍。

但正因為佢呢個原理，兼且佢真係殺到蟲，唔少用家反映用完之後，一夜之間十幾廿隻曱甴等緊你執係平常事，多嘅甚至五十隻都有，而且有人亦指曱甴雖然係反咗肚，但其實未死透，試想像下一起身就見到一地曱甴腳撐撐等緊你，你都咪話唔驚！難怪日本用家們會用「地獄繪圖」黎形容。

所以即使明知佢有用，唔少網民都因為驚面對「屍橫遍野」嘅畫面而唔敢用，唔知大家又情願置之死地而後生，定係冇眼屎乾淨盲呢？