據美國媒體報導，美國雅培 (Abbott) 獲得美國食品藥品監督局批準，將開始製作肺炎快速檢測卡「BinaxNOW」。而且該檢測卡成本只需5美金、整個檢測過程只需15分鐘、無需使用研究所設備，即係極方便使用之餘，亦可以大大減低泄漏基因資料嘅憂慮。

據雅培嘅公告，BinaxNOW測試過程依然需要用到鼻咽拭子，用支棉花棒撩下個鼻咽之後直接隊入張BinaxNOW測試卡，等十五分鐘就會有結果。如果呈陽性，測試卡表面個有如驗孕棒咁嘅試紙窗就會有兩條線，陰性就得一條。

而測試原理就唔係檢測病毒基因，而係檢測肺炎病毒嘅蛋白質外殼存在與否。雅培指測驗陽性準確度達97.1%、陰性準確率為98.5%。雅培亦會同時推出手機App「NAVICA」，經測試後嘅用家可以選擇下載並紀錄、展示測試「健康碼」，方便進出需要檢驗嘅地方。

特別值得一提嘅係由於整個檢測過程不需經過研究所，測試本身亦非以基因為檢測對象，而個「健康碼」亦係自願性使用，能大大減輕「政府監控」嘅疑慮。

據《CNBC》報導，美國總統特朗普將於日內宣佈，向雅培訂購1.5億張檢測卡，預計有咗呢個快速檢測方法，能夠加快社會回復正常生活。而雅培方面就指檢測卡會於9月開始生產，預計產量1000萬張，到10月更能達至5000萬張。