最近政府再出辣招，700萬以下物業按揭減至六成，香港人要買樓確實艱難。即使買唔到樓，想要一個個人的小天地都唔過分吧？一個屬於自己的空間，擺滿自己的心頭好，以及喜愛的家品，可以說是星斗市民一種心靈慰藉。

灣仔星月街一帶因為有許多外藉人士流連，加上各種各樣特色小店，予人一種置身於外國的悠閒感覺。

街頭就有間名叫「Cocktail JOJO」的小店，灰色外牆配搭白色的窗框，架起綠白色帳篷，門上貼上英國味道海報，充滿外國風情。店外更留了一個像露天茶座的窄長空間，放置了數張露天木茶座，售賣咖啡花茶。

不過唔好誤會，「Cocktail JOJO」雖然個名有「Cocktail」呢個字，但店內不賣雞尾酒，Mean娜問到老闆Luke何解用到Cocktail一字，佢解釋，因為Cocktail係用好多種酒溝埋，非常豐富又特別，而佢嘅雜貨店亦係乜都有，所以就諗到用Cocktail一字；至於JOJO，則係Luke愛貓的名字。

咁其實「Cocktail JOJO」跟一般雜貨店有咩分別？坊間一般家品店或雜貨店，來來去去都係內地進口嘅貨色，高級少少的話，可以找到日韓或少許歐美雜貨，但普遍而言，店來嘅貨品都係周圍容易見到，少不了撞貨問題。

但「Cocktail JOJO」係Luke多年來，在各地旅遊時搜集的心頭好，有見數量太多，於是開間特色小店，所以裡頭賣嘅貨品，都非常獨特，來自世界各地，亦有不少外國市集的珍寶，到此購物，有種尋寶的感覺。

而Luke本身是櫥窗設計師，又係時裝品牌 Chapel' 的設計師兼創辦人，眼光之好可以說是不容否定。「Cocktail JOJO」裡頭除了Luke自己發掘的寶物，更有許多加入自己設計的作品，例如tote bag、布圍裙等等。

另外Luke認識許多藝術界的朋友，於是在店內放了許多朋友們的設計，支持本地創作之餘，亦增添了店來貨品的獨特性。