日本嘅觀光列車素來都係又靚又高級，為遊客提供一個既有地方特色又極度舒適嘅旅程。而九州嘅全黑色復古「36+3」環島觀光列車就於10月正式通行，親身去唔到，睇下相都開心。

圖片：JR九州

之所以會叫「36+3」呢個咁怪嘅名，係因為九州乃係世界第36大島嶼，同時整條列車亦會行經35個有傳說故事嘅當地景點，再加上坐緊車嘅乘客就係36個故事；至於「+3」就係指乘客、九州及九州居民，又可以係「驚喜、感動同幸福」——簡單啲黎講就係好有心機嘅包裝好件事啦。

圖片：JR九州

至於列車本身，就係由1992年出廠嘅JR 787開建而成，外表改用黑色，而內部就用上大量充滿懷舊感覺嘅佈置，大量碎花布、磁磚、木製傢私及榻榻米，營造出質感懷舊但感覺舒適嘅環境。頭兩節車廂及第三節前半為包廂、第三節後半係餐廳、第四節就係酒吧等公共空間，第五、六節則為寬敞座位。

圖片：JR九州

「36+3」總共有五條路線，其實就係將環島路線分成五日，星期四由博多出發、經過鹿兒島、宮崎、大分、回到博多再轉往長崎，每程車都會提供以沿路地區特色食材製作嘅膳食，整條路線本身就係一個5日嘅行程。如果第時仲有機會去日本嘅話，大家不妨親身體驗一下。

資料來源：JR九州