唔少人都曾經諗過搬去東京住，但絕大部份人都只係停留喺「諗」嘅階段，而其中一個令人打退堂鼓嘅原因，就係傳聞中「東京啲租好貴」，之但係實際上又有幾貴？對比全球樓價最高嘅香港黎講，又係咪真係稱得上係貴？日本一間地產公司就做咗個調查，搵出東京各區嘅租樓成本。

圖片：Suumo

日本Suumo調查咗東京JR山手線30個站嘅15分鐘步行距離以內、開放式住宅及一房單位 (日本稱為1K及1DK)嘅平均月租，發現最貴嘅分別係原宿及涉谷兩大潮流集中地，月租分別要13.5萬Yen (約HK$9,800) 及12.8萬Yen (約HK$9,400)，新宿則為11.25萬Yen (約HK$8,250)，出名好住嘅目黑區為10.7萬Yen (約HK$7,830)，之於最平嘅就係田端、目白、西日暮里三個站，月租都係8.5萬Yen，即係大約HK$6,200左右。

圖片：Suumo

以香港嘅標準黎講，最貴都只係一萬銀唔使其實真係相當平！不過喺大家執包袱搬去日本之前，必須要留意嘅係即使同為開放式或一房單位，實際大小都可以差好遠。Suumo嘅調查中面積最大嘅一間房有430平方尺，最細嘅一間只有108平方尺，而站邊嘅環境亦對日常生活有非常大影響 (我就住過喺田端，附近真係可以話咩都冇)，所以就算去到日本都唔好淨係睇價錢租樓呀。