自從一向做「實事」嘅香港政府上週宣佈「0+3」入境安排，加上日本政府宣佈10月11日後開放自由行，香港人嘅旅行慾被全面點燃，唔少人已經買咗機票準備「疫情後第一飛」。而據旅遊網站Trip.com提供嘅數據，過去呢個週末買機票嘅人急升，其中去大阪嘅人更急升7300%。

據Trip.com數據顯示，同再上一個週末相比，佢哋網站嘅香港出境航班訂單量升咗4倍，而曼谷、首爾、東京、新加坡及大阪就係前五最多人去嘅地方。如果按目的地分類，買機票去曼谷嘅人數，比起再上週多咗6倍、去首爾嘅人亦多咗7倍，但要數到港人最愛嘅始終係日本，去東京人數升咗近14倍，去大阪人數更加急升73倍。

網站亦指，大部份訂單嘅日期都集中於10月初嘅公眾假期以及聖誕假附近，而香港用戶訂酒店嘅平均日數為3-4日，意味大部份人都希望食埋個公眾假期去個短Trip。

圖片：Unsplash

好多人因為「0+3」想離開香港，咁又有冇人因為「0+3」而想返黎香港呢？據網站數據，訂機票返香港嘅人數雖然都有增加，但增長就遠不及離港嘅人，只係多咗155%。而入境地前五名就係曼谷、倫敦、新加坡、台北、曼徹斯特，當中增長最多嘅係曼谷，升咗兩倍。網站指預期海外旅客需要更多時間消化「0+3」措施，所以預計第四季嘅入境旅客人數會大幅增長。目前大部來港訂單都集中於10月下旬，平均會逗留5日左右。

資料來源：Trip.com