小編自問眼力愈來愈差，原因都離不開日睇夜睇住個電腦或iPhone螢幕所致，又唔願改，分分鐘未到40十歲，就要配返副老花眼鏡。

但呢位名叫Tom Lynall嘅仁兄，英國伯明翰人士，眼力就非常之勁。本為珠寶商嘅佢，基於工作理由，成日都需要用足眼力去鑑賞各種類型嘅珠寶，久而久之，過人嘅眼力可能就係咁鍛鍊返嚟。而佢有一日，坐係自己工作室嘅時候，突然拎起面前嘅鉛筆再望住筆芯位置，覺得自己可以係呢細小範圍內，雕刻一啲東西出來。

Tom Lynall本身都鍾情藝術，但奈何自己資質有限，畫畫真係唔在行，所以，係有限嘅資質上，搵到「雕鉛筆芯」呢項興趣，佢就非常之高興兼持之而行。呢項興趣最主要工具，就係一枝鉛筆，雕刻刀，非常簡單，不過，最緊要都係你本人眼力夠，手夠定，有齊兩樣先可以「入行」。