最近，網站Buzzfeed列出43樣事情，係一班1999年出生，即現時16歲嘅後生仔未必會知道嘅事情，而有關科技嘅事項就被提出得最多，咁又係嘅，你睇iPhone一年都唔知轉幾多代啦，你仲同班後生仔講磁碟（floppy），佢真係會當係史前文物嚟看待囉！

以下就列舉其中10樣事情，若果你知道晒嘅話，相信你嘅年紀都應該唔細；

1.投影機

細個上堂嘅時候，如果被老師欽點去推部投影機嘅話會覺得好威，但家陣部機應該已經被埋沒係學校一個嘅黑暗嘅角落裡……

2.「電話記憶體已滿」

以前嘅電話收得太得信息就已經會顯示出呢個畫面，對照現時嘅電話功能，記憶體閒閒地都有16GB、32GB，除非你喪影相喪拍片先會爆，如果單單信息就肯定有排都未爆。

3.貪食蛇遊戲

可能你連幾年前大hit嘅Angry bird憤怒鳥都已經唔記得係咩嚟嘅時候，更何況貪食蛇呢？

4.電話傳歌

以前想慳錢唔買CD，而又想將首歌存入落電話度，就會有下情形出現，會搵有嗰首歌嘅朋友仔用電話過歌，而家？隨時隨地下載，存有幾千首歌是常識吧！

5.查黃頁

唔好話99年出生嘅朋友無試過查黃頁啦，連89年出生嘅朋友都可能已經對黃頁無晒印象啦！

6.堂上傳紙仔

除非你好著重親筆手寫呢回事，如果唔係，大部份人都應該已經由堂上傳紙仔，改為堂上傳whatsapp啦！

7.有線電話

講電話唔可以行太遠，因為電話唔係無線？

8.報紙搵戲院場次

過往，報紙嘅功能好多方面，包括搵戲院場次，同埋……欣賞三級片名。

9.摸黑玩Gameboy

而家你晚晚唔願瞓，其中一個原因係掛住用手機打機，隨時隨地點打都得，因為夠晒光，想當年要打Gameboy，係要想辦法搵到光源，同時又唔可以俾阿媽發現，唔係就死硬。

10.磁碟存資料

回想當年，磁碟（floppy）都幾好用，攜帶尚算輕巧方便，只不過輸在容量唔夠大，同埋……要有磁碟機配合囉！