每次身邊人歷經生理期，你見到佢痛到面容扭曲兼面無血色，作為男友或老公，按道理都應盡本份，守候身邊，對佢呵護備至，但你居然卻步了，因為你怕，怕咩呢？就係怕佢會突然間情緒失控火山爆發，將所有身上嘅痛楚，發洩係你身上。

咁點算好呢？呢種情況真係左右做人難，係身邊又怕，走咗去又唔係咁好，每個月都要面對呢個問題，相當頭痕，點做先至算係應對呢類危機嘅上佳之策呢？

第一︰照顧飲食

唔係叫你煮足一日三餐，而係要準備可以減輕生理期時所引起不適嘅食物及飲品，最方便就係買定即沖黑糖薑茶及熱朱古力，見佢有乜唔妥即時送上，呢啲sweet位絕對唔可以懶。

第二︰進行按摩

有時女性「出血」過多，就會見暈，或者腳部會見水腫，又會腰痛，總之就係周身骨痛，男士們有見及此，屆時最好露兩手，幫女伴進行按摩服務，舒緩痛楚，講真，你幫佢減低痛楚時，你都有好日子過吓。

第三︰免問長問短

當痛起上嚟，真係咩都唔想做、咩都唔想講，但你仲係到不斷問「有無事呀？」「邊到痛呀？」感覺就相當煩人，雖然你嘅問候出自真心，但適時閉咀會令大家過得好啲囉！