Lenny Robinson年輕時於巴爾的摩(Baltimore)成立咗一間清潔公司，後來佢將整盤生意放售，得到嘅錢足夠佢買一架黑色林寶堅尼作蝙蝠車、5000美金買一套蝙蝠裝、以及每年花費25000美元於送畀小朋友嘅玩具上。

儘管佢由2001年開始就以蝙蝠俠身份探望兒童病人，但直到2012年佢先因為一條Youtube影片而進入公眾目光。話說當時佢正以全套裝備加蝙蝠車於路上行走，但由於蝙蝠車嘅車牌不附合標準而被截停。警員亦被「全副武裝」嘅Lenny嚇一嚇，最後不單止冇抄牌，仲同佢合照一張。而整個過程就被後車影到兼放上網，令Lenny以「Route 79蝙蝠俠」之名廣為人知。

Lenny多年黎走訪美國馬里蘭州(Maryland)以及華盛頓一帶嘅醫院，以蝙蝠俠身份為小童加油打氣。好多家長都指佢嘅到訪係小朋友幾個月以黎最開心嘅事。

當年Lenny係因為自己個仔(Lenny為三子之父)鍾意，所以先會打扮成蝙蝠俠。但佢見到其他小朋友對其打扮嘅反應之後，就發現另一種意義。有時佢個仔亦會打扮成羅賓與其一同「出動」。