外界一直盛傳，Apple正在開發首款摺疊式手機（暫稱iPhone Fold）﹐預計在明年秋季隨iPhone 18系列一同登埸。近日有外媒就聲稱，從配件製造商取得一組CAD設計圖，進一步揭示呢款摺機嘅尺寸及比例。設計並非外界想像中嘅「兩部iPhone Air拼埋」咁修長，而係走較為方正嘅路線，摺疊時猶如一本薄仔，完全展開後尺寸則接近iPad mini。

據外媒《iPhone-Ticker.de》取得嘅CAD圖紙顯示，iPhone Fold在摺疊狀態下，身機闊度約83.8mm、高度約120.6mm﹐而厚度就只有驚人嘅9.6mm（不包括鏡頭突出部分），並配備一個5.49吋外螢幕（2088x1422像素），整體比例比市面上多數摺機更加方正，應該會更易於單手操作。而當展開後，內螢幕則達7.76吋（2713x1920像素），雖然略小於8.3吋嘅iPad mini，但螢幕解像度比iPad mini更高。

至於相機方面，圖紙顯示iPhone Fold採用雙鏡頭配置，與傳聞所指嘅單鏡頭說法有所出入。另外，內外螢幕都各自配置一個前置鏡頭，其中內螢幕嘅鏡頭位於機身一側。目前都唔清楚會否採用動態島設計，定抑或改用傳聞中Apple正研發嘅屏下Face ID技術。

值得留意嘅係，著名蘋果消息追蹤網站《Appleinsider》指出，雖然呢組圖紙看似合理，但Apple向來唔會隨便向任何配件/保護殼生產商提供設計資料，尤其係距離發布仲有一段時間。因此，呢批CAD圖更大機會係配件商根據坊間傳聞自行製作模具後流出，未必代表最終設計。隨住發布時間逐步接近，相信未來會有更多爆料出現，資訊亦會愈來愈準確。