我成日都話「鹹濕」係推動人類（至少係男性）活動嘅一大動力，但有時都真係會低估某啲人對於某啲癖好嘅執著。好似近日日本就有單新聞，話有個男人走入千葉縣一間高中，去偷女學生著過嘅室內鞋黎聞，結果被當場發現。但最令人驚訝嘅唔係佢「偷鞋黎聞」呢件事，而係呢個男人竟然係「由名古屋特登去千葉縣偷鞋黎聞」！都唔知係咪應該要讚佢好有行動力啦。

圖片：Wikicommons

據《ANNnews》報導，本月6日千葉縣八代市嘅一間高中，有個男老師巡視學校時，發現某個女廁入面有個廁格係閂咗門嘅。由於當日係禮拜六，學校除咗呢個男老師自己之外就應該無人，疑惑之下老師就去查看，結果發現入面嘅係一個攬住5對學生室內鞋嘅男人，老師於是就報警。

後來警方調查發現，犯人係於某公司做管理層、現年37歲嘅「足立亮太郎」。更驚人嘅係，呢位「足立亮太郎」係住喺直線距離300公里外嘅名古屋，當日係先坐新幹線去東京，再轉電車去千葉，然後轉多程的士先去到事發學校。都真係稱得上不辭勞苦。

問題係點解佢要走到咁遠去偷鞋呢？據「足立亮太郎」透露，佢非常沉迷於女生嘅氣味，於是產生「聞下女學生室內鞋」嘅念頭。問題係名古屋所在嘅愛知縣嘅學校，通常都係提供拖鞋型嘅室內鞋，換言之就即係無咩味可以聞、聞得唔夠爽。於是佢就決定遠赴提供普通鞋型室內鞋嘅關東地區。

對於呢單新聞，網民紛紛大罵「足立亮太郎」係「徹頭徹尾嘅變態」，但有唔少留言亦非常幽默。例如有人就感嘆「無呢個行動力就做唔到高層呢」，亦有人嘲諷「睇佢個名就知佢鍾意腳啦！」