所謂「食色性也」，雖然大家未必會拎出嚟討論，但相信絕大部分人都會認同「性愛」係兩性關係之中最重要、最根本嘅環節之一。美好嘅性體驗能夠促進雙方嘅關係，反之則可能令關係產生裂痕。但問題就在於，究竟點先算係一次「美好性愛」呢？來自美國密蘇里大學嘅兩位研究員就進行咗一個小型調查，發現「高潮」、「情感交流」以及「化學作用」，係美好性愛嘅三大重要元素。但佢哋同時發現，每個人對於「美好性愛」嘅定義可以非常不同，所以講到尾，最重要嘅都係溝通。

來自馬蘇里大學嘅Alicia Walker以及Audrey Lutmer，早前以電郵訪問咗78位不同年齡、性向、性別以及關係狀況嘅美國成年人，並要求佢哋列出心目中美好性愛嘅重要元素。其中有52%人認為情感交流對於美好性愛非常重要，但要注意嘅係，佢哋講緊嘅「情感」唔一定係「愛」。報告中指出部份受訪者明確表示「情感交流」不一定與「浪漫」或「愛」有關，就算雙方之間完全無「愛」都可以構成美好性愛。亦有16%人認為情緒交流不影響性愛體驗。

另外有49%受訪者認為高潮為美好性愛嘅重要元素，但當中亦有「橋妙」。報告指出部分受訪者只關心自己有沒有達到高潮，而另一部分受訪者則更著重雙方有冇達到高潮，甚至有20名受訪者表示能否達到高潮根本不影響性愛體驗。

第三個美好性愛嘅重要元素則為「化學作用」，有36%受訪者表示重要。受訪者普遍同意所謂化學作用係「不能控制」或「人工創造」，但不少人都表示，化學作用嘅背後係對對方嘅喜愛及信任，令佢哋可以放開自己。

雖然是次研究能夠粗略列出三個美好性愛嘅重要因素，但考慮到無任何一個因素真正得到大部份人認同，即使認同同一個元素，每個人對於如何「達標」亦有不同定義。所以研究員提醒：「你同伴侶之間嘅『美好性愛』定義可能非常唔同，你覺得好嘅，伴侶可能覺得普通甚至係差，而且我哋通常唔會拎出黎講，但其實我哋應該咁做。越開放地討論自己嘅性需要及期望，能夠有相應體驗嘅機會就更高。」

資料來源：Caring, Chemistry, and Orgasms: Components of Great Sexual Experiences