提起「高梨瑞樹」呢個名，大家可能會有些少印象，事關2020年時佢曾經於個人YouTube製作幾條「裸體圍裙煮飯仔」嘅影片成為一時網絡熱話，當時我亦曾撰文介紹過。咁幾年過去，「高梨瑞樹」近排又有咩搞作呢？答案就係繼續行大膽路線，除咗成為著名嘅「0.01安全套」代言人外，仲於YouTube挑戰「裸藝」！

現年25歲嘅「高梨瑞樹」自2019年出道後就頗受歡迎，箇中原因除咗佢本身真係樣靚身材正之外，更重要嘅係2020年起佢開設個人YouTube頻道，並拍攝一系列如上文提過嘅「裸體圍裙煮飯仔」之類、遊走於「II B」到「三級」尺度之間嘅影片，令佢得到唔少網上討論。而網上人氣亦帶動佢嘅寫真活動，例如單係2020年就一次過出咗三隻寫真DVD、四條網上寫真影片再加十本電子寫真。

但或者係受到YouTube黃標影響，又或者係熱潮已過，自2021年起「高梨瑞樹」嘅YouTube觀看數就不停下跌，寫真活動亦漸見冷卻。所以佢於去年決定刪哂YouTube所有舊片「砍掉重練」，仲練習通常係男性搞笑藝人玩嘅「裸藝」(即係全身赤裸用個鐵盤遮住下體做出各種高難度動作嘅表演)，打算重振聲威。結果再次獲得《週刊Playboy》邀請拍攝寫真，仲成為埋安全套代言人。睇完之後真係會令人覺得，寫真女星呢份工其實都唔易打！

IG：tkns_mzk