根據我哋過去嘅經驗，日本寫真攝影師對於相中人嘅皮膚狀態係非常執著，喺保留膚質睇落自然嘅情況下，習慣將皺紋、毛孔、癦等等瑕疵通通執走。換言之如果大家睇寫真時見到個女星身上有癦，一係攝影覺得係賣點，一係就女星自己要求保留。咁唔知今晚要介紹呢位「高島江梨奈」胸前嗰幾粒癦，又係於咩情況下而留底呢？

「高島江梨奈」係去年先出道嘅日本女子偶像，比較特別嘅係佢一出道就已經身兼兩團。佢於去年8月加入2023年成立嘅女團「あまいものつめあわせ」，成為當中嘅黃色擔當；亦係視覺系樂團PENICILLIN主唱「HAKUEI」製作嘅二人組合「CLIONE」成員之一，去年11月仲去過台灣同人動漫展表演。另一樣比較特別嘅係，「高島江梨奈」並無公佈自己嘅出生年份，呢個做法通常都只見於年紀較大先出道嘅女星，但睇落佢都仲係幾後生呀？唔知佢點解要隱瞞年齡呢？

不過佢無隱瞞嘅，就係佢嘅身材。去年出道後「高島江梨奈」好快就吸引到《週刊Young Jump》搵佢拍寫真，展示佢唔算誇張但勝在均秤嘅好身材。本月初佢為《週刊Playboy》拍攝寫真時，更於X上自爆「胸懷大痣」，左邊心口其實有兩粒癦，其中一粒更要非常低胸先睇到。或者就係因為睇到幾多粒癦等如佢有幾性感，所以攝影師都無執走啦！

IG：eina_dayooo2