- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| 《Call of Duty》最新一集「Advanced Warfare」(以下簡稱《CoD: AW》)，之前fans睇到trailer已經勁興奮。梗係啦，《CoD》系列不嬲落重本整宣傳片，今次仲請埋奧斯卡影帝Kevin Spacey飾演大反派恐怖份子大佬Jonathan Irons，又有《拆彈雄心》、《追擊拉登行動》嘅荷里活編劇Mark Boal，同真嘅軍事顧問幫手度故仔同做設定，啲trailer唔多人like至奇。 不過呢，睇片同玩game點都係兩回事。計埋星期一偷跑，《CoD: AW》賣咗3日，單機模式已經有人打爆咗，multiplay各個模式又已有好多人玩，係時候寫寫筆者嘅試玩意見。 | |
| |
| 循例講吓故事背景先，今集設定年份係2054年，恐怖組織KVA肆虐到連美軍都搞佢哋唔掂，於是各國要請僱傭兵集團ATLAS嚟對付佢哋，玩家當然就係做ATLAS嘅軍人啦。由舊作嘅現代背景跳去今集嘅未來，一睇條橋就知會加入科幻元素，結果最主要加咗嘅，係玩家可以着上一啲叫做「Exoskeleton外骨骼」嘅裝甲，之後會提升攻擊力、移動速度、彈跳力，甚至能夠令到玩家隱形等等，直接啲講，即係為遊戲加入特殊能力。 | |
| |
| 多咗呢啲特殊能力，筆者覺得玩落係就係會變得多花臣啲，較有新鮮感，但同時都削弱咗以前講求實力同戰術嘅玩法設計。尤其係玩multiplay嗰陣，筆者遇過唔少鬼佬玩家郁得快到好似識瞬間轉移咁，要同佢哋鬥跑真係幾有難度。 | |
| |
| 另外，今集嘅跳躍技能都引嚟好多玩家討論，仲有人話啲角色會跳到好似《Halo》咁款。我就唔覺得似《Halo》，不過班外國玩家又真係好很鍾意跳咁款，成日用Super Jump跳上天台，好似Sniper咁射人，有時真係避唔嚟。 | |
| |
| 至於玩FPS game multiplay最怕嘅屈重生點，感覺上《CoD: AW》比《Battlefield》或者《DESTINY》屈得易，我就試過幾次一死完翻生就俾賤友吼準狂射再即死，走都走唔甩，重生點設計可以改好啲。仲有，《CoD: AW》multiplay個server始終存在屈線問題，即係如果對手嗰隊有人做host嘅話，系統會計算佢哋隊啲人嘅動作先，明明大家一齊開槍，結果都會係我中槍先。但呢個問題都係好多FPS game會有，《CoD: AW》唔係特別嚴重就算啦。 | |
| |
| 不過，今集最值得讚嘅，係將上集《Call of Duty: Ghosts》離譜地大嘅地圖，收細番到正常水平，可以好似再之前咁放心走位搵敵人，一定冇咁易俾班不思進取嘅玩家玩camp殺到（死守喺有利位置埋伏人）。同埋今集啲槍嘅平衡度唔錯，唔會一有支勁槍就天下無敵。仲有今集有個盾牌識得打開，畀人瞄準後打開即射，好好用。 | |
| |
| 整體嚟講，我覺得今集其實比上集難玩咗，成日中幾槍就死，但幾有挑戰性，可玩度都算強，畫面質素同流暢度亦唔錯。只係如果你真係唔太習慣多咗啲特殊技能嘅話，強烈建議你玩番經典模式，玩法接近舊作，可以享受番有攻有守有走位有駁火嘅實戰快感，唔好咁快話放棄隻game！ | |
| |