Marvel電影近年已經成為全球最受歡迎嘅電影系列，基本上一上映就必定大賣收場。不過，有人愛就一定有人唔愛，其中近日上映嘅新戲《沙丘瀚戰》導演 Denis Villeneuve就肯定唔係Marvel Fans。

Denis近日接受訪問時就批評Marvel電影，令觀眾都變成了殭屍，因為佢覺得Marvel電影實在太多，而當中大部份都只係「複製貼上」，拍攝嘅格式同手法都非常相似，可以話係「罐頭」電影，當中唔同嘅製作人可能會為電影各入少少不同色彩，但都只係喺其Marvel工廠下倒模出來。

Denis認為，Marvel呢類大預算電影，理應可以帶出藝術層面嘅級數，就好似Christopher Nolan 與 Alfonso Cuarón嘅電影，唔係話大片就一定無藝術成份。

不過作為《奇異博士》導演嘅Scott Derrickson就唔太同意Denis嘅說法，佢覺得作為一名導演，就算唔鍾意其他導演嘅作品，都唔會去作出批評，因為拍電影實在已經有夠辛苦，並從來唔會有人想拍出一部差嘅電影。Scott又覺得，批評Marvel電影嘅人，基本上一係無睇過晒全部作品，一係就全部睇過，而實際上佢地都好愛Marvel電影。

唔知你又會唔會覺得Marvel電影太一式一樣？雖則拍攝手法可能接近，但每個系列嘅故事內容都唔一樣，而藝術成份喺英雄片又係咪一定要加入呢?