喺呢個又多人又嘈嘅香港，唔少人都習慣一出街就戴住個earphone聽歌，甚至有唔少人連做緊嘢、溫緊書、同人傾計等都堅持要聽住歌，仲話聽歌可以幫到佢哋更加專注。不過根據日本東北大學教授川瀨哲明團隊做嘅研究，就發現只要你係聽緊歌、哪怕非常細聲，其實都會影響你嘅專注力及反應。

圖片：Unsplash

川瀨哲明教授做嘅研究相當簡單，佢哋先於測試者嘅右耳播放爵士鋼琴樂或者白噪音，左耳就會不定期地播放提示音，然後要求測試者一聽到測試音就按下按鈕，去測試處於不類型聲音時嘅反應時間以及準確性。

結果就發現，如果右耳係聽緊白噪音，測試者嘅反應時間同冇聽緊任何嘢時差唔多，甚至快咗少少；但如果係聽緊音樂嘅話，反應就會變慢 (中位數為10毫秒左右)。證明音樂其實係會分散注意力。

圖片：Different contra-sound effects between noise and music stimuli seen in N1m and psychophysical responses

更值得一提嘅係，測試時音樂嘅音量係由30分貝播到80分貝，但無論係咩音量，對於反應時間嘅影響都係差唔多。換言之，只要你聽緊音樂，不論係大聲定細聲，你嘅專注力都會受到影響。所以聽住音樂做嘢、溫書，似乎就唔係一個最有效嘅方法。

資料來源：Different contra-sound effects between noise and music stimuli seen in N1m and psychophysical responses