按照日本情人節傳統，唔少女仔都會喺當日送朱古力畀佢哋心儀嘅男仔、朋友、藝人，甚至乎動漫或遊戲角色表達愛意。隨住情人節將近，日本著名遊戲開發商KOEI TECMO（光榮特庫摩），就率先發聲明呼籲Fans們今年唔好再送朱古力到公司。

日本遊戲發開商KOEI TECMO可以話係男女機迷通殺，除咗有《信長之野望系列》、《真．三國無雙系列》、《生死格鬥系列》吸引男Fans，旗下亦有針對女性玩家嘅《安琪莉可系列》及《遙遠時空系列》，所以公司每逢情人節及白色情人節都會收到大量Fans們送上嘅朱古力。

相信大家未玩過都聽過《生死格鬥系列》

女性向遊戲《刀劍亂舞無雙》

然而，日前KOEI TECMO就出聲明呼籲大家唔好送朱古力，事關目前大部份員工都在家工作，考慮到收件困難及安全問題，決定今年情人節及白色情人節一律拒收禮物，希望各位能夠諒解。其中有網友就表示，如果唔係KOEI TECMO嘅公告，都唔知道原來每年都有咁多忠實Fans送朱古力畀織田信長。