荷里活製作嘅遊戲改編電影，一般都會選用歐美演員出演，並全程以英文發音，而非遊戲所設定嘅語言及種族，難免會令觀眾產生違和感。但凡事總有例外，最近《對馬戰鬼》真人版導演就拍晒心口，表示電影將採用全日本演員陣容以及日語發音，唔知大家又會唔會期待呢？

由Sucker Punch Productions開發嘅PlayStation獨佔大作《對馬戰鬼 Ghost of Tsushima》大受好評，至今已賣出超過1000萬份。而Sony亦喺上年宣布推出真人版電影，並由《John Wick》系列導演Chad Stahelski執導。

最近Chad Stahelski接受外媒《Collider》訪問時提到：「為咗忠實呈現蒙古人入侵對馬島嘅歷史，電影將採用全日本演員卡士，並以日語發音，而Sony亦非常支持呢個決定。我從16歲開始就經常去日本旅遊，我對呢個國家、人民及語言都非常熱愛。」另外，導演亦表示有鑑於《魷魚游戲》嘅成功，加上國際串流平台盛行，相信西方觀眾會願意同愈嚟愈習慣睇戲要睇字幕。

《對馬戰鬼》改編自真實歷史事件「文永之役」，講述主角境井仁聯同舅父率領島上武士們抵抗元軍入侵，但可惜不敵對方慘遭團滅，從此踏上復仇之路，放低武士包袱，化身成戰鬼對抗蒙古大軍。