隨住手機及網絡越黎越普及，唔少傳統服務亦轉向提供網上版。例如著名日本漫畫週刊《少年Jump》早於8年前就開始提供網站及應用程式「Jump+」服務，唔少大熱漫畫如《SPY×FAMILY間諜家家酒》、《怪獸8號》等都係於Jump+連載。近日佢哋就透過員工訪談，透露出網絡連載嘅數據——原來有近三成讀者都只係會睇一頁，黎決定是否追看新作。

Jump+頁面

《少年Jump》網站「Rookie.shonenjump」日前就訪問咗負責Jump+數據嘅員工K先生。據K先生指出，讀者之所以會於網站或應用程式中點開一部新作，通常都係因為睇到作品嘅縮圖 (即係廣告)，又或者係單純嘅「撳錯」。由於並唔係深思熟慮嘅行為，所以佢哋非常容易放棄繼續閱讀。實際上有大約三成人係睇咗作品嘅第一頁就已經決定棄坑，其他人亦大都只會閱讀3-5頁，睇到十頁之後已經可以算係作品嘅真正讀者。

另外Jump+亦非常著重作品嘅「揭頁率」，即有幾多讀者睇完一頁之後會揭去下頁，顯示出作品於頁與頁之間能夠留住幾多讀者。K先生指出，如果作品嘅揭頁率能夠維持於99.8%或以上，就代表佢嘅讀者人數已經穩定下來。所以「儘早令揭頁率維持於99.8%」就成為網絡連載嘅成功條件之一，越遲達到目標，就代表前面嘅頁數都流失緊讀者。

《ハイパーハードスペシャルミッション》

《ハイパーハードスペシャルミッション》嘅數據。藍線為揭頁率、橙色條為該頁閱讀時間

K先生指出決定「揭頁率」嘅一個重要條件，係作品嘅文字數量。考慮到Jump+讀者大多係用手機觀看，如果作品太多字就會令螢幕顯得非常擁擠而且難以閱讀，唔少讀者都會因此而被「勸退」。但咁又唔代表作品整體越少字越好。K先生以靜脈原作、依田瑞希作畫嘅《ハイパーハードスペシャルミッション》做例子，作品第一話前半部份嘅字數都非常少，所以揭頁率於第六頁後就維持於99.8%以上，隨住讀者投入漫畫世界，即使後半部出現「讀者要用10秒以上閱讀」嘅多字數頁面，揭頁率都冇因此下跌，證明只要吸引到讀者留低，佢哋其實唔介意睇多啲字。

資料來源：Rookie.shonenjump