之前介紹過嘅日本LEGO神人「セイレイ（X@seirei526）」近日又有新作品。繼去年嘅風靈高達以及獨角獸高達之後，佢最新推出《馬沙的反擊中》嘅「Nu高達」，高度還原細節之餘仲用LEGO成功營造出機械厚重感，如果佢推出套裝嘅話，相信不論LEGO迷定高達迷都會想入手！

自稱「再現系LEGO Builder」嘅「セイレイ」，自去年起就開始利用LEGO還原各款高達，到目前為止已經完成咗1/26嘅獨角獸高達、1/36嘅風靈高達、1/36嘅沙薩比、以及高、闊都超過70cm，全重3公斤嘅飛昇自由高達。而佢自3月開始，就以 @shun_m47製作、獲得2013年「高達模型製作家全球盃（GBWC）」全球總冠軍嘅「宇宙世紀最強機體」Nu高達為藍本，開始製作LEGO版本。

從其X上發佈嘅過程照，可見「セイレイ」係由身軀部份開始，再慢慢完成整個骨架，然後就係為各個部份加上非常細致嘅裝甲，最後還原出整台Nu高達。「セイレイ」亦表示，製作Nu高達嘅最大難題在於保持平衡，尤其係背後嘅浮游飛翔砲，整得太大太重部機就企唔穩，但太細太薄個比例唔啱之餘又失去機械厚重感。所幸最終佢搵到兩者嘅平衡。

資料來源：seirei526