由Predator（血獸）擔正主角嘅《Predator: Badlands（鐵血戰士：蠻荒廝殺）》今日公開正式預告，展示更多精彩動作畫面！年輕血獸Dek為向族人證明自己嘅能力，前往宇宙最危險星球展開狩獵，但幸運嘅係，佢絕非孤身一人，仲有合成人Thia同佢並肩作戰。

《Predator: Badlands》由《Prey（鐵血戰士：狩獵追擊）》導演Dan Trachtenberg執導，並與Patrick Aison再度聯手合寫劇本。故事講述一位被部落驅逐嘅年輕血獸Dek，前往全宇宙最危險嘅星球展開首次狩獵，目的係殺死當地最強生物「終極掠食者」，藉此向族人證明自己能力，並在過程中意外結識到由科技公司Weyland-Yutani所製造嘅合成人Thia（無錯，繼《異獸戰》後兩大IP再度聯乘），兩人為咗各自目標而攜手合作。

從預告可見，身為狩獵初哥嘅Dek，面對星球上嘅危險動植物顯然有點力不從心，甚至差啲被一隻類似翼龍嘅生物捉走，幸得Thia及時出手相救，兩人自此結為盟友。Dek孭住得返半邊身體嘅Thia，聯手尋找「終極掠食者」，畫面令人不禁聯想起《星球大戰》Chewbacca孭住C-3PO嘅情景（可能係致敬？）。而喺片尾，仲出現一具疑似《異形》系列嘅動力裝甲「Power Loader」同一隻神秘怪獸決鬥，Thia更留下一句耐人尋味嘅說話：「呢場狩獵入面，我吔可能唔係唯一嘅獵人。」莫非佢指緊嘅就係駕駛裝甲嘅人？電影將於今年11月正式上映。

《異形續集》劇照