最近Ubisoft喺公司年報提到，在單機遊戲加入「微交易（microtransactions）」可以令玩家體驗更有趣，因為玩家可以課金買角色外觀裝飾，或者加速遊戲進度。

微交易系統（MTX）近年已成為遊戲業常態，並在大型免費線上遊戲中尤其流行，亦喺遊戲開發商嘅重要收入來源。今年初有研究指出，2024年全球PC遊戲市場收入有58%嚟自微交易，總額高達244億美元，當中又以《Call of Duty: Black Ops 6》、《Roblox》及《Fortnite》吸引最多玩家課金。不過，Ubisoft唔單止喺免費線上遊戲加入微交易，連要畀錢買嘅單機遊戲都引入呢個系統，例如早在2017年《Assassin's Creed Origins（刺客教條：起源）》就開始畀玩家課金買額外服裝、坐騎同更強武器。自此之後，Ubisoft幾乎每一款付費單機遊戲，例如Far Cry系列第5及第6集，Assassin's Creed系列嘅 《Odyssey》、《Valhalla》、《Mirage》同最新嘅《Shadows》，全部都有微交易系統。

對此，Ubisoft執行長 Yves Guillemot日前就在年度財務報告中表示，微交易系統能令玩家體驗更有趣（more fun），因為玩家可以自訂角色外觀或加速遊戲進度。並強調微交易系列只係一個可選項目（optional），唔想課金嘅玩家依然可以享受完整遊戲內容。至於點解Ubisoft咁鍾意加入微交易系統？因為真係好賺，亦係令《Assassin’s Creed Valhalla》在當年破系列紀錄，創下超過10億美元收入嘅關鍵因素。

但公道講句，Ubisoft並非唯一一間鍾意加入微交易嘅開發商，Capcom、Activision Blizzard、EA、Warner Bros.都有喺單機遊戲中加入微交易系統。唯獨《The Witche》系列及《Cyberpunk 2077》開發商CDPR公開表明，佢哋唔會喺旗下單機遊戲加入微交易，但唔排除未來會喺多人遊戲中使用呢系列。唔知大家又點睇呢個趨勢呢？